🇨🇳🇵🇰 China ne Pakistan ke Pehle Astronaut ka Elan Kar Diya — Pakistani Astronaut Jald Space Mission Par Jayega!

Beijing (Web Desk): China ne aik historic elan karte hue kaha hai ke woh Pakistan ke pehle astronaut ko apne space station missions ka hissa banayega. Chinese state news agency Xinhua ke mutabiq, aik Pakistani astronaut jald hi Chinese astronauts ke saath mil kar short-term space mission par jayega.

China Manned Space Agency (CMSA) ke press conference ke dauran bataya gaya ke do Pakistani astronauts ko China Astronaut Centre mein training di ja rahi hai. In mein se aik ko payload specialist ke taur par Chinese Space Station “Tiangong” ke mission mein bheja jayega.

Is se pehle SUPARCO (Space and Upper Atmosphere Research Commission) aur CMSA ke darmiyan aik cooperation agreement sign hua tha, jiske zariye Pakistan ke pehle astronauts ko China ke saath mil kar space mission par bhejne ki raah hamwar hui.

Training program ke baad, jo astronaut select hoga woh scientific payload specialist ke taur par Tiangong Space Station par mukhtalif research karega — jisme biological sciences, medical research, aerospace, fluid mechanics, ecology, material sciences, microgravity aur astronomy jese fields shamil hain.

China ka kehna hai ke Tiangong Space Station mein advanced experimental systems aur external adaptors lage hue hain, jinke zariye multi-domain research possible hai. In experiments ke natayij se medical research, environment monitoring aur space technology mein nayi rahein khulengi, jo zameen par zindagi behtar banane mein madadgar sabit hongi.

Is ke ilawa, Pakistan aur China ne October 2025 mein ek naya five-year action plan (2025–2029) bhi finalize kiya hai, jisme astronaut training, Pakistan Space Centre ka qiyam, aur joint lunar aur deep space exploration projects shamil hain.

Dono mumalik ne ye bhi reaffirm kiya ke woh 2021–2030 Space Cooperation Outline Program par amal jari rakhenge — jisse Pakistan ko mustaqbil mein human spaceflight missions mein bhi hissa lene ka mauqa mil sakta hai.

🛰️ Ye Pakistan ke liye aik nayi space era ka aaghaz hai!
Ab Pakistani scientist aur astronauts bhi un country’s ki saf mein shamil ho rahe hain jo space mein apni pehchan bana rahe hain.